काल अॅपल स्टोअरमधे जाऊन आयपॅड पाहून आलो. चांगला अर्धा पाऊण तास हाताळून पाहिला. अॅपलच्या इतर वस्तूंप्रमाणेच ही वस्तू चांगली आहे. आयपॅड नेटवर वाचलं तेव्हा थोडं नाऊमेद झाल्यासारखं वाटलं होतं खरं पण प्रत्यक्ष वस्तू पाहिल्यावर थोडं बरं वाटलं. या आयपॅडबद्दल मला जाणवलेल्या काही बऱ्यावाईट गोष्टी :

वाईट :

1. मल्टिटास्किंगचा अभाव : यावर एका वेळी एकच अॅप्लिकेशन चालतं. आयपॅड हा फक्त एक मोठ्ठा आयपॅड आहे असं वाटण्याचं हे महत्वाचं कारण.
2. फ्लॅश चालत नाही : HTML5 उंबरठ्यावर उभं असताना खरंचर याची चिंता करायची गरज नाही पण यावर फ्लॅश मधले गेम्स खेळता येणार नाहीत हे ऐकून बघून वाईट वाटतंच.
3. सुळसुळीत कीबोर्ड : काचेवर टंकायची सवय होईपर्यंत याचा कीबोर्ड तसा वापरायला झुळझुळीत आहे.
4. देवनागरी कीबोर्ड उपलब्ध नाही  : यावर देवनागरी नीट चालत नाही, दिसतही नाही, वेलांटीचा आणि जोडाक्षरांचा जरा प्रॉब्लेम आहे. टंकलेखनासाठी थेट कीबोर्डही उपलब्ध नाही. ती सोय मिळवण्यासाठी काही जुगाड करावे लागण्याची  शक्यता आहे.

बऱ्या :

1. सुटसुटीत : याचं वजन एखाद्या मध्यम आकाराच्या पुस्तकाएवढं आहे. एकूण आकारही असा आहे की फार वेळ हातात धरलं तरी त्रास होणार नाही.
2. मोठा पडदा : आयपॅडचा पडदा (स्क्रीन) हा  आयपॉडपेक्षा जवळजवळ चौपट मोठा आहे. अॅपलची अॅप्लिकेशन्स या उपलब्ध जागेचा पुरेपूर वापर करतात. गेम्स खेळायला हा आकार उत्तम आहे तसंच एखादं पुस्तक वाचायलाही सोयिस्कर आहे. मी आयपॉडवर पुस्तक वाचायचा प्रयत्न केला होता पण तो आकार फारच छोटा पडतो. आयपॅड उभं धरलं की एका साधारण पुस्तकाच्या पानाइतका मजकूर पडद्यावर असतो. पुस्तक वाचायचा अनुभव टिकून राहतो.
3. सिनेमे बघण्यास उत्तम : गादीवर पडून चित्रपट बघण्यासाठी हा सर्वोत्तम प्रकार आहे. यावर यूट्यूब बघता येतं, आय-ट्यून्स मधून ओतलेले सिनेमे बघता येतात तसंच नेटफ्लिक्स ऑनलाईन बघण्यासाठीही एक मोफत अॅप्लिकेशनही उपलब्ध आहे.

माझा निष्कर्ष :

सध्या थोडं थांबायला हरकत नाही. पुढच्या पिढीतील (नेक्स्ट जनरेशन, नेक्स्ट वर्जन) आयपॅड्समधे काही वाढीन सोयी असण्याची शक्यता नाकारता येत नाही. सध्या आयपॉड किंवा आयफोनवर सहज भागेल. (शिवाय आयफोन गेल्याच महिन्यात घेतलाय..)

आपला,

~नॅकोबा

(एक सरळ अर्थाची, एक विषय धरून आणि अव्रात्य पोस्ट… काही खरं नाही… निमूटपणे झोपलेलं बरं.)